Mundua betetzen huen
Eta Gorlako bideetan,
Edozein hiritako alde-zaharreko kale-zirrikitu
Eta goardasolpean
Lanbroaren zirri-zarra estutik
Libratzen ginenean.
Â
Eta aise paseatzen geninan
Hegan bezala
Debrazete abiatzen ginenetan.
Â
Eta orain mundua zagon hutsik
Eta geu, bakarrik
Mandarina zuritu, kafea gozatu
Edo autoko erretrobisoretik hire bila
Abiatzen denean gure gogoa,
Esnatu nahi ez dugunean
Eta batez ere, hitzerdi batekin
Erakarri ezin haugunean
Eta gela hotzotan
Hustasuna neurtzen baino asmatzen ez dugunean.
Hauxe da Intermezzo poema, Tere Irastorzak idatzi du eta Pamiela argitaletxeak kaleratu berri du. Mundua betetzen zenuten izena dauka poema liburuak, eta besteak beste, galera batek, amaren eta lehenago aitaren galerek eragindako hutsunetaz jardun du poema liburu honetan. Tere Irastorzak luzea du ibilbidea. 1961ean Zaldibian jaiotako idazleak Gabeziak kaleratu zituen 1980an. Harrezkero: Hostoak, Gaua eta gau aldaketak, Derrotaren fabulak, Osinberdeko kanthoreak edota Eta orain badakit lanak kaleratu ditu. Poesia izan du nagusi, baina saiakera eta egunkarietako zutabegintzan ere aritu izan da. Bere poemak idazteaz gain osterantzeko poeten lanak euskarara ekarri izan ditu.
Goizalde Landabaso