Pompas de papel

Denbora itxeskatzen doa pentsamenduaren isurian

hausturak eraginez;

Argiaren ikarak baselizaren itzala hazten du

eta instantean hustasun betea altxatzen da

muga baten gisa gure aitzinean.

Oinarrizko hitzak kulunkatzen dira denboraren altzoan,

Argiñetan.

Galtzearen armarriak zizelkatzen ditugu

etxeetako atarietan,

bat batean eratorri

eta aurkitze,

Argiñetan.

Maitasuna ere aldatzen doa

denboraren besarte zilarretan,

bukatzen denean berriz non hasten den ez dakigula,

Argiñetan,

agian.

Hauxe da Itxaro Bordak idatzitako poemetako bat, eta Balea Zuria argitaletxeak kaleratutako Abaro lanean aurki genezake. 1959an Baionan jaiotako Itxaro Borda poesiara itzuli da. Egia esan, sekula ez da poesiatik joan, baina bere idatzietan bestelako genero literarioak tartekatzen ditu. Oraingoan, esan bezala, poesia. Poema intimoak ageri dira lan honetan zeinean denboraren joana nabarmenki azaltzen den. Denbora ez baita alferrik joaten, baita Itxaro Borda idazlearentzat ere. 30 bat poema dira Abaro honetan aurki genitzakeenak, guztiak liburuari emandako izenburuari men eginez.

Goizalde Landabaso