Pompas de papel

Urrundu egin zara ezkutuko bidetik

maiteen duzun ahanzturaren putzurantz

ur bizietatik ihesi,

baina ezin duzu errekaren indarra gelditu

bere uharriez kolpatu zaitu.

Betiko iraungo duzu,

itsasoa elikatzen duen min bustiak bezala,

garratz, guztiz egiazko,

izate benetako,

gailurrari emanak diren arimen gisan,

hausterre bihurtutako mendeak arbuiatuz.

Urrats bakoitzean itzulminaren zama daramazu,

behin eta berriz birsortzen zaizun aberriaren beruna,

espiritu ahaztezinen  desoseguzko oroipena,

ibili nahi ez duen

bihotz desorduz mindua.

Poema honek Bide Erratua izena du eta Karlos Santistebanek idatzi zuen Alberdaniak kaleratutako Oroimenaren larratzak liburuan. 1960an Karrantzako haranean jaiotako idazlea da Karlos Santisteban. 1983an Hitzak poema liburuarekin ekin zion literatur bideari. Harrezkero 50 bat liburu kaleratu ditu, genero gehienetan, baina batez ere, haur eta gazte literaturan jardun du. Poesian baditu zenbait lan kaleratuak. Eta sariak ere irabaziak ditu: Bilbo Hiria poesía saria, Irun Hiria poesía saria edota Ernestina de Champourcin saria. Esku artean dugun liburu honekin  Blas de Otero saria irabazi zuen.

Goizalde Landabaso