Zure buruaz beste egiten duzunean
Zentzuaren logikak agindu du.
Zure buruaz beste egiten ez duzunean
Biziraupen logikak irabazi du.
Â
Zentzuaren logika nagusi balitz
Humanitatea ez litzateke existituko
Beraz eskerrak
Zor zaizkionak baino ez.
Jule Goikoetxearen lehenengo poema liburua Tomasi eskainitako dago. Ez dakigu nor ote den Tomas. Badakigu hasierako berbetan aipatzen duela. Eta azkeneko hitzak, NON ZAUDE TOMAS, berarentzat direla.
Lehenengo poema liburu honetan esaldi bikainak aurkitu ditut: KOLONIZATUA DAUKAT IMAJINAZIOA… POBREZIA BESTERIK EKOIZTEN EZ DUEN MEKANISMOA DA KAPITALA… EZ NAIZ ZURE, EZ ZENUKE JAKINGO ZER EGIN HORRENBESTE DISIDENTZIAREKIN… edota, ORAIN ORDEA BALIO TAXOLOGIKORIK GABEKO ANIMALIA ZARA ZU ERE.
Onartu behar dut izan direla poema zenbait baten baino gehiagotan irakurri behar izan ditudanak, eta ulertu ez ditudanak ere bai. Eta akorduan izan dut aspaldiko literatura irakaslea; poemak disekzionatzen zituen berak, hoztasun ikaragarriarekin egiten zuen, laborategi bateko saguak bailira lez. Eta beti iruditzen zitzaidan zatiketa horretan, txikitasun horretan, poemak indarra galtzen zuela. Ez ditut disekzionatu.
Barra batean enkoadraturik
Disolbatzen da arratsaldea;
Argi mehe baten pean
Elkarrizketa merkez
Trago koma irri batetan.
Burutazio hordiek
Eskasiaren sen on batez
Mugitu gabe sahiesten dituzte
Absurdua, luxua eta arrazoia.
Â
Asmo pildatsuek laguntzen dute
Arretarik ezean hazitako desioa,
Baina haur eszena hutsalez
Eta ardi aroko etorkizunaz
Gizendutako orainaldi honi kateatua da
Obrero eta exiliatuarena den
Gehiengoaren bizitza.
Ironia, mina, poza, desioa, sexua, musika, maitasuna eta bere hutsa; eta bere gabezia…
GUREA DENA LARRUZ ORDAINTZEN DA, esaten du esaldi ederretako batekin. Tractatus, Tomas Goikoetxeari eskainitako mundu bat.
Goizalde Landabaso