Neguak harrapatuko nau.

Eta zu

elur maluta baten antzera

jausiko zara nire magalera.

Eta ni

elur maluten leuntasunez

pausatuko naiz zure ezpainetan.

Eguzkiaren gozoak bezala

urtuko dituzu nire bular gainak.

Eta negu aro hau epeldu egingo da

desiraren beroaz zure besoetan.

Neguak harrapatuko nau.

Eta zuk

haize zorrotzaren antzera

gorrituko dizkidazu masailak.

Eta nik

izoztutako beldurrak

urtuko ditut zure besoetan.

Haur jolasetako elur bolak bezala

jaurtiko ditut duda-mudak.

Eta negu aro hau epelduko dugu

elkarren sutondoko garretan.

Poema honek Elur malutak izena dauka, eta Ekhiñe Eizagirreren lehenengo poema liburuan dago, Susa argitaletxeak kaleratutako Alde erantzira nabil liburuan. Zarautzen jaio zen 1984. Urtean, eta azken hamar urteotan idatzitako poemak dira, egoera deserosoan egindako poemak, izan ere, Ekhiñe Eizagirre Fresnes-eko kartzelan espetxeratuta dago. Poema guzti hauen ontze lanetan Maite Egiguren aritu izan da. Intimoak dira, eta ardatz garbiak dituzte; feminismoa, identitatea, errepresioa, borroka, desira… Liburua hiru zatitan banatuta dagoela esan genezake: Zarautzko bizimodua, batetik, sasian emandako garaian, eta espetxean idatzitakoak. Ez dira, ez, poema liburu askorik kaleratzen, eta hauxe da 2016ko uztaren hasieretakoa.

Goizalde Landabaso