Nola? Galdetu didazu.
Nola?
Eta haizeak ilea astindu dizu
galsoro ihartuari bezala.
Hogeita hamar urte dira lur hauek
poza eta
laborria urtzen zituen
aho gustu harekin
utzi genituenetik.
Nola? Oihukatu didazu.
Muinoaren gainean gaude,
gure aita-amena zen
etxaldeari so.
Beste batzuenak dira orain hango
otorduak, lorratzak,
hango piztien usaina,
artilezko jertseak,
askak,
tanga esne gordinez beteak,
gurutzeak,
lotsa
eta goizeko leia.
Nola? Erantzuna erregutu didazu.
Arreba, entzun:
kalkula ditzagun indarrak,
oreka dezagun begirada
eta orratz ditzagun ileak
bata bestearen ttuaz.
ilunabarra da, ordu aproposa.
Etorri, arreba, heldu sendo,
goazen galdu genuen hura
berreskuratzera.
Hauxe da Josu Goikoetxearen Muino izeneko poema, Elkar argitaletxearen eskutik kaleratu berri duen Zer luzea negu hau liburutik ateratakoa. Josu Goikoetxea Gernikan jaio zen 1974an. Bertso gai jartzaile moduan jardun du urte luzeetan eta gaur egun argitaletxe batean egiten du lan editore bezela. 90. hamarkadan Lubaki Banda literarioko kide izan zen: Harkaitz Cano, Xabier Gantzarain, Asier Serrano, Lierni Ibargutxi edo Mikel Reparazekin batera. Hauxe da bere lehenengo poema liburua.
Goizalde Landabaso