Biluzik egongo naiz,
Zatoz zu ere biluzik
Laztanduko zaitut
Eskuekin
Ahoarekin,
Oinekin,
Gorputz osoz
Munduaren amaierara bidaiatuko dugu
Mila izerdik zipriztindutako
Milaka urteko
Gurdi karrankarian,
Dardara bakoitza arnasa berri
Irekiko natzaizu
Itsas hondoa bezala,
Salda amniotiko bakarrean urtzeko
Zatoz zu ere biluzik,
Beldur, nahi eta itxaropenak erantzita.
Poema hau Idurre Eskisabel kazetari eta irakasleak idatzi du eta Desira izena du. 1970ean jaio zen Beasainen eta Susa argitaletxearekin kaleratu du bere lehenengo poema liburua, Goseak janak. 82 poema dira lehenengo lan honek batu dituenak 4 zatitan banatua. Durangoko Azokara begira egongo den poema liburu berrietako bat izango da Idurre Eskisabelena.
Goizalde Landabaso